Í fjöleignarhúsum býr fjölbreyttur hópur fólks og því miður geta komið upp aðstæður þar sem einstakur íbúi gengur á rétt annarra og veldur óviðunandi ástandi í húsinu.
Þá vaknar spurningin: hvaða úrræði hefur húsfélagið til að bregðast við slíku?
Stutta svarið er þetta:
Húsfélagið getur, við ákveðnar aðstæður, lagt bann við búsetu og dvöl viðkomandi íbúa og jafnvel krafist þess að hann selji eignarhlut sinn.
Í 55. gr. laga nr.26/1994um fjöleignarhús segir:
„Gerist eigandi, annar íbúi húss eða afnotahafi sekur um gróf eða ítrekuð brot á skyldum sínum gagnvart húsfélaginu eða eigendum, einum eða fleirum, þá getur húsfélagið með ákvörðun skv. 6. tölul. B-liðar 41. gr. lagt bann við búsetu og dvöl hins brotlega í húsinu, gert honum að flytja og krafist þess að hann selji eignarhluta sinn.“
Af þessu leiðir að tvennt þarf að vera uppfyllt
- Að íbúi hafi gerst brotlegur annað hvort ítrekað eða með grófum hætti.
- Að húsfélagið fylgi ákveðnum formreglum áður en gripið er til þessa úrræðis.
Áskorun er fyrsta skrefið
Áður en húsfélagið getur gripið til aðgerða samkvæmt 55. gr. ber því að senda íbúanum skriflega og sannanlega áskorun, þar sem hann er hvattur til að bæta siði sína og hann varaður við afleiðingum þess ef áskorunin ber ekki árangur.
Áskorunin þarf að vera rétt að efni og formi – rangar eða ófullnægjandi tilkynningar eru líklegar til þess að draga úr árangri á síðari stigum.
Fundur og ákvörðun húsfélagsins
Ef íbúinn lætur ekki segjast, þrátt fyrir áskorunina, þarf að boða til húsfundar þar sem ákvörðun er borun upp um að leggja bann við viðkomandi íbúa.
Til þess að slík ákvörðun sé bindandi þarf minnst 2/3 hluta eigenda að samþykkja hana, bæði miðað við fjölda og eignarhluta, sbr. 6. tölul. B-liðar 41. gr. laga nr. 26/1994.
Að lokinni ákvörðun húsfundar
Eftir að húsfundurinn hefur samþykkt bannið getur húsfélagið stefnt málinu fyrir dóm til að fá bannið staðfest og – eftir atvikum – fá viðkomandi gert að selja eignarhlut sinn.
Mikilvægt að fá rétta aðstoð
Þessi málsmeðferð er flókin og fjölþætt. Mistök í geta tafið málið eða gert það að verkum að dómsmál nái ekki settum árangri. Því er öruggast fyrir húsfélagið að leita lögmannsaðstoðar strax í upphafi.
Ef húsfélagið þitt stendur frammi fyrir slíkum vanda, þá erum við tilbúin til að hjálpa.
