Í dómi Landsréttar í máli nr. 565/2024 var leyst úr ágreiningi vegna slyss á vinnustað og farið yfir sjónarmið sem koma til skoðunar við mat á því hvort slysið hafi verið eigin sök starfsmannsins, óhappatilvik eða saknæma háttsemi atvinnurekandans:
Starfsmaður A var við sumarafleysingar í fiskvinnslu B hf., og slasaðist á vinstri baugfingri þegar hún var að þrífa færiband við aðgerðarlínu í frystihúsi. Færibandið hafði verið lyft upp úr þvottakari en var enn í gangi þegar hanski A kræktist í og fingurinn klemmdist.
B hf. var með frjálsa ábyrgðartryggingu en tryggingarfélagið hafnaði bótaskyldu á þeim grundvelli að um óhappatilvik eða eigin sök A væri að ræða.
Landsréttur lagði til grundvallar að A hefði hvorki haft reynslu af því að þrífa þetta tiltekna færiband né fengið fullnægjandi leiðbeiningar eða þjálfun fyrir verkið. Í áhættugreiningu frystihússins var ekki sérstaklega fjallað um þrif á færiböndum. Þá var talið að það verklag að lyfta beltinu upp úr karinu á meðan það var enn í gangi hefði verulega aukið slysahættu, þrátt fyrir að hægt hefði verið að stöðva eða hægja á beltinu án teljandi vandkvæða.
Dómurinn taldi verklagið andstætt ákvæðum laga um aðbúnað, hollustuhætti og öryggi á vinnustöðum, sem og viðeigandi ákvæðum reglugerðar um notkun tækja. Brotin, ásamt annmörkum á fræðslu, verkstjórn og skipulagi vinnu og hvíldartíma, fólu í sér saknæmt, óforsvaranlegt vinnulag sem var orsök slyssins. Skilyrði sakarreglunnar voru því talin uppfyllt og var viðurkennd óskert bótaskylda tryggingarfélagsins úr ábyrgðartryggingu B hf. vegna líkamstjóns A.
Dómar sem þessi eru ágætist forvörn fyrir önnur fyrirtæki. Á atvinnurekendum hvílir lagaleg skylda að tryggja öryggi starfsfólks. Í skyldunni felst að verklag sé vel skilgreint og öruggt, að starfsfólk fái viðeigandi þjálfun og leiðsögn, að áhættugreining sé gerð og áhættur metnar og að starfshættir séu þannig að starfsmaður sé ekki settur í óþarfa hættu. Ef þessar kröfur eru ekki uppfylltar, getur vinnuveitandi borið bóta- eða ábyrgðarskyldu á slysi.
Hvernig er þessu háttað hjá þínu fyrirtæki?
